Неделя 18-я по Пятидесятнице. Глас 1-й

Поста нет

Воскресные

Тропарь, глас 1
Ка́мени запеча́тану от иуде́й/ и во́ином стрегу́щим Пречи́стое Те́ло Твое́,/ воскре́сл еси́ тридне́вный, Спа́се,/ да́руяй ми́рови жи́знь./ Сего́ ра́ди си́лы небе́сныя вопия́ху Ти́, Жизнода́вче:/ сла́ва воскресе́нию Твоему́, Христе́,/ сла́ва Ца́рствию Твоему́,// сла́ва смотре́нию Твоему́, еди́не Человеколю́бче.

Кондак, глас 1
Воскре́сл еси́ я́ко Бо́г из гро́ба во сла́ве,/ и ми́р совоскреси́л еси́;/ и естество́ челове́ческое я́ко Бо́га воспева́ет Тя́, и сме́рть исчезе́;/ Ада́м же лику́ет, Влады́ко;/ Е́ва ны́не от у́з избавля́ема ра́дуется, зову́щи:// Ты́ еси́, И́же все́м подая́, Христе́, воскресе́ние.

Преподобному Кириаку отшельнику, Палестинскому

Тропарь, глас 1
Пусты́нный жи́тель, и в телеси́ А́нгел,/ и чудотво́рец показа́лся еси́, богоно́се о́тче наш Кириа́че,/ посто́м, бде́нием, моли́твою Небе́сная дарова́ния прии́м,/ исцеля́еши неду́жныя и ду́ши ве́рою притека́ющих к тебе́./ Сла́ва Да́вшему тебе́ кре́пость,/ сла́ва Венча́вшему тя,// сла́ва Де́йствующему тобо́ю всем исцеле́ния.

Кондак, глас 2
Чистото́ю душе́вною боже́ственно вооружи́вся/ и непреста́нную моли́тву, я́ко копие́, вручи́в кре́пко,/ ссекл еси́ де́монская ополче́ния,/ Кириа́че, о́тче наш,// моли́ся непреста́нно о всех нас.

Ин кондак, глас 8
Я́ко побо́рника кре́пкаго и засту́пника/ чту́щи тя свяще́нная ла́вра всегда́,/ пра́зднует ле́тне па́мяти./ Но, я́ко име́я дерзнове́ние ко Го́споду,/ от враго́в находя́щих соблюди́ ны, да зове́м:// ра́дуйся, о́тче треблаже́нне.

Святителю Иоанну (Максимовичу), архиепископу Шанхайскому и Сан-Францисскому

Тропарь, глас 5
Попече́ние твое́ о па́стве в стра́нствии ея́,/ се проо́браз и моли́тв твои́х, за мир весь при́сно возноси́мых./ Та́ко ве́руем, позна́вше любо́вь твою́,/ святи́телю и чудотво́рче Иоа́нне!/ Весь от Бо́га освяще́н священноде́йствием пречи́стых Та́ин,/ и́миже сам при́сно укрепля́ем, поспеша́л еси́ ко стра́ждущим, цели́телю отра́днейший.// Поспеши́ и ны́не в по́мощь нам всем се́рдцем чту́щим тя.

Ин тропарь, глас 1
Святи́тельства дар преумно́жил еси́, сло́ва пропове́данием апо́столом поревнова́в, бде́нием же, посто́м и моли́твою с преподо́бными вмени́лся еси́, клевету́ и поноше́ния с кро́тостию прие́мля. Сего́ ра́ди Христо́с тя просла́ви чудесы́, и́хже оби́льно излива́еши на всех с ве́рою притека́ющих к тебе́: и ны́не спаса́й нас моли́твами твои́ми, Иоа́нне досточу́дне, святи́телю Христо́в.

Кондак, глас 4
Се́рдце твое́ объе́млет всех любо́вию/ моля́щих ти ся, Иоа́нне святи́телю,/ и помина́ющих по́двиг жития́ твоего́./ Безболе́зненно же ле́гкое преставле́ние твое́ бысть,// Одиги́трии Пречи́стыя ве́рный служи́телю.

Ин кондак, глас 4
Христу́ Пастыренача́льнику после́довав, во святи́телех изря́днейший яви́лся еси́, спасл бо еси́ о́вцы своя́ от губи́тельства безбо́жных, приста́нище ми́рное тем учреди́в, и попече́ние непреста́нное о па́стве име́я, врачева́л еси́ их неду́ги душе́вныя же и теле́сныя, и ны́не о нас к твои́м честны́м моще́м припа́дающих, моли́ Христа́ Бо́га, о́тче Иоа́нне, в ми́ре спасти́ся душа́м на́шим.

Молитва
О святи́телю о́тче наш Иоа́нне, па́стырю до́брый и тайнови́дче душ челове́ческих! Ны́не у Престо́ла Бо́жия за нас мо́лишися, я́коже и сам посме́ртне изре́кл еси́: «А́ще и умро́х, но жив есмь». Умоли́ всеще́драго Бо́га проще́ние нам во гресе́х дарова́ти, да бо́дренно воспря́нем, и Бо́гу возопие́м о дарова́нии нам ду́ха смире́ния, стра́ха Бо́жия и благоче́стия во вся́ческих путе́х жи́зни на́шея, я́ко ми́лостивый сиропита́тель и иску́сный наста́вник на земли́ быв, ны́не бу́ди нам путеводи́тель и в сму́тах церко́вных Христо́во вразумле́ние. Услы́ши стена́ние смяте́нных ю́ношей на́шего лихоле́тия, обурева́емых беснова́нием вселука́вым, и при́зри на уны́ние изнемога́ющих па́стырей от утесне́ния тлетво́рнаго ду́ха ми́ра сего́ и томя́щихся в нераде́нии пра́здном и ускори́ на моли́тву, сле́зно вопие́м ти, о те́плый моли́твенниче; посети́ нас си́рых, по всему́ лицу́ вселе́нныя разсе́янных и во оте́чествии су́щих, во тьме страсте́й блужда́ющих, но сла́бою любо́вию ко све́ту Христо́ву влеку́щихся и жду́щих твоего́ оте́ческаго наставле́ния, да благоче́стию навы́кнем и насле́дницы Ца́рствия Небе́снаго яви́мся, иде́же ты пребыва́еши со все́ми святы́ми, сла́вяще Го́спода на́шего Иису́са Христа́, Ему́же честь и держа́ва, ны́не и при́сно и во ве́ки веко́в. Ами́нь. Творение иеромонаха Серафима Платинскаго

2-я Молитва
О святи́телю чу́дне Иоа́нне, толи́ко распространи́л еси́ се́рдце свое́, я́ко нете́сно вмеща́ется в нем мно́жество почита́ющих тя челове́к от разли́чных племе́н и наро́дов! При́зри на убо́жество слове́с на́ших, оба́че от любве́ тебе́ приноси́мое, и помози́ нам, уго́дниче Бо́жий, поне́ отны́не очища́ти себе́ от вся́кия скве́рны пло́ти и ду́ха, рабо́тающе Го́сподеви со стра́хом и ра́дующеся Ему́ с тре́петом. И что возда́мы тебе́ за ра́дость о́ную, ю́же ощути́хом, зря́ще в хра́ме святе́м мо́щи твоя́ святы́я и прославля́юще па́мять твою́; вои́стину, не и́мамы, чим возда́ти, то́чию а́ще на́чнем себе́ исправля́ти, быва́юще но́ви вме́сто ве́тхих. Сея́ благода́ти обновле́ния бу́ди нам хода́тай, свя́те Иоа́нне, помози́ нам в не́мощех, исцели́ боле́зни, уврачу́й стра́сти моли́твами твои́ми; преста́вленный же от сего́ вре́меннаго во ино́е жити́е ве́чное, в не́же наста́ви тя Пречи́стая Влады́чица, Одиги́трия разсе́яния ру́сскаго, чудотво́рною Свое́ю ико́ною Коренно́ю‑Ку́рскою, Ея́же спу́тник ты яви́лся еси́ в день преставле́ния своего́, ра́дуешися ны́не в ли́це святы́х, сла́вящих Еди́наго в Тро́ице сла́вимаго Бо́га, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь. Творение иеромонаха Серафима Платинскаго

Священномученику Иоанну (Поммеру), архиепископу Рижскому

Тропарь, глас 4
И нра́вом прича́стник,/ и престо́лом наме́стник апо́столом быв,/ дея́ние обре́л еси́, Богодухнове́нне,/ в виде́ния восхо́д,/ сего́ ра́ди сло́во и́стины исправля́я,/ и ве́ры ра́ди пострада́л еси́ да́же до кро́ве,/ священному́чениче Иоа́нне,/ моли́ Христа́ Бо́га// спасти́ся душа́м на́шим.

Кондак, глас 4
Во святи́телех благоче́стно пожи́в,/ и муче́ния путь проше́д,/ и́дольския угаси́л еси́ же́ртвы,/ и побо́рник быв твоему́ ста́ду Богому́дре./ Те́мже тя почита́юще та́йно вопие́м ти:/ от бед изба́ви ны при́сно твои́ми моли́твами,// о́тче наш Иоа́нне.

Молитва
О, всеблаже́нне святы́й священному́чениче святи́телю о́тче на́ш Иоа́нне, пра́вды Бо́жия побо́рниче и святы́я правосла́вныя ве́ры Христо́вой защи́тниче, хули́телей Святы́я Це́ркве обличи́телю, враго́в прогони́телю, оби́димым покрови́телю и все́х ве́рных христиа́н те́плый предста́телю. Ты́ все́ю душе́ю от ю́ности за́поведи Христо́вы возлюби́л еси́. И во дни́ гоне́ния лю́таго на ве́ру Правосла́вную, я́ко и́стинный па́стырь яви́лся еси́, кре́стный пу́ть проше́д: поруга́ние, заточе́ние, оклевета́ние претерпе́вый и та́ко му́ченический вене́ц восприя́л еси́, обре́тши благода́ть Го́споду моли́тися за ны́. Ве́мы, я́ко ты́, предстоя́ Престо́лу Вседержи́теля, и́маши ве́лие дерзнове́ние в моли́твах пред Го́сподем. И ны́не смире́нно припа́даем и усе́рдно мо́лимся: о, ско́рый засту́пниче на́ш, святи́телю священному́чениче о́тче Иоа́нне, услы́ши на́с гре́шных и недосто́йных ча́д твои́х: умоли́ Всеми́лостиваго Го́спода и Пречи́стую Его́ Ма́терь Пресвяту́ю Богоро́дицу ве́ру правосла́вную соблюсти́, Святу́ю на́шу Це́рковь укрепи́ти в еди́нстве ми́ра и любви́, отпа́дшия от Святы́я Це́ркве па́ки возврати́ти, страну́ на́шу Латви́йскую в ми́ре, христиа́нских доброде́телех и благоде́нствии сохрани́ти. Помози́ на́м и ра́зум на́ш пита́ти не су́етною му́дростию челове́ческою, но смире́нным позна́нием во́ли Бо́жия. О, святы́й уго́дниче Бо́жий, не пре́зри на́с моля́щихся тебе́: не то́кмо от бе́д и скорбе́й избавле́ния про́сим, но си́лы и тве́рдости, великоду́шия и любве́, дабы́ претерпе́ти о́ныя напа́сти возстаю́щия на ны́. Испроси́ на́м неосла́бное терпе́ние до конца́ жития́ на́шего, ми́р с Го́сподем и грехо́в на́ших проще́ние. Е́й, святы́й священному́чениче, моли́ Го́спода Бо́га и Спа́са на́шего Иису́са Христа́ Сы́на Бо́жия изба́витися на́м от вся́каго зла́ и сохрани́ти хра́м се́й, и гра́д, и страну́ на́шу, и лю́ди благоче́стно чту́щия тя́ от вся́кия напа́сти, от боле́зней, гла́да, пото́па, огня́, меча́, наше́ствия иноплеме́нников и междоусо́бныя бра́ни, от клеветы́ и вся́каго зла́го обстоя́ния. Моли́твами твои́ми святы́ми разсе́янныя собери́, заблу́ждшия на пу́ть пра́вый наста́ви, ста́рость поддержи́, ю́ныя вразуми́, младе́нцы воспита́й и все́х на́с с любо́вию почита́ющих тя́ утверди́, да пребу́дем в любве́ дру́г ко дру́гу, единомы́сленно испове́дуя Отца́ и Сы́на и Свята́го Ду́ха, Тро́ицу Единосу́щную и Неразде́льную, и та́ко да сподо́бимся Небе́снаго Ца́рствия, иде́же сла́вится Пречестно́е и Великоле́пое И́мя Пресвято́й и Живонача́льной и Неразде́льней Тро́ицы. Ами́нь.

Величание
Велича́ем тя,/ священному́чениче Иоа́нне,/ и чтим святу́ю па́мять твою́,/ ты бо мо́лиши о нас// Христа́ Бо́га на́шего.

Собору святых Челябинской митрополии

Тропарь, глас 4
Святии угодницы Христовы,/ скорбяще, гоними и унижаеми,/ сокровище Евангелиа в сердцах ваших сохранисте/ и живот вечный наследовасте,/ темже и нас молитвами вашими в чистоте и правде сохраните/ и люди земли нашея/ разумом истины просветите.

Кондак, глас 3
Вас, святии угодницы наши,/ Челябинская земля славословит/ и подвигу вашему дивится,/ вы бо, телеса ранам предавше,/ венцы нетленныя от Христа прияли есте,/ темже молитвами вашими ко Господу/ помозите нам в терпении крест свой понести/ и душам нашим испросите велию милость.

Молитва
О, святии угодницы Божии, святителие, пастырие и мирстии, верность Христу даже до смерти явившии и венец жизни от Него приемшии! Вы во вся дни жизни вашея образ терпения, непостыднаго упования и совершенныя любве показали есте и землю нашу Южноуральскую подвигом своим освятили есте. Ныне же, в раи сладости наслаждающеся, Престолу Божию во славе предстоитé и присно хвалу и ходатайство со Ангелы и всеми святыми Триединому Богу возносите. Сего ради мы, недостойнии, молим вас, святии сродницы наши: не забудите земнаго отечества вашего, беззаконии отягченнаго; умолите Господа Сил, да утвердит Церковь Свою непоколебиму в мире сем многомятежнем и лукавом, в земли же нашей возродит дух разума и благочестия, дух братолюбия и мира, яко да возможем врага спасения нашего победити, в чистоте и правде живот свой сохранити и Царствия Небеснаго достигнути, идеже вкупе с вами сподобимся прославляти Отца и Сына и Святаго Духа во веки веков. Аминь.

Собору святых Кубанской митрополии

Тропарь, глас 4
Днесь ликовствует земля Кубанская, / прославляющи святители, преподобныя и новомученики своя, / во благочестии подвизавшияся и страданьми украсившияся,/ и небесныя венцы от Господа приемшия. / Темже празднующе священное их торжество, / с верою и любовию вопием:/ святии сродницы и теплии ходатаи наши,/ молите Отечеству мир даровати// и душам нашим велию милость.

Кондак, глас 2
Твердии Православия исповедницы/ и веры апостольския служителие,/ вси святии в земли Кубанстей просиявшии/ и пределы южныя земли Российския прославившии./ Восхваляюще подвиги и труды ваша,/ страдания же и мучения почитающе,/ во умилении вси зовем:// радуйтеся, земли Кубанския похвало и Церкве нашея украшение.

Молитва
О, теплии пред Господeм наши молитвенницы, вси святии, в земли Кубанстей просиявшии! 
Се ныне, в день общаго вашего торжества, мы, чада ваша духовная, призывающе вас на помощь, прославляем труды и болезни, подвиги и чудеса ваша, страдания же и долготерпение! Вемы бо, яко имате велие дерзновение ко Всемилостивому Богу, сего ради с верою и упованием к вам взываем: испросите у Господа земли Кубанстей и всему Отечеству нашему благоденственное и мирное житие, правителем доброе попечение о людех, пастырем в служении их апостольскую ревность, всем же нам усердие в молитве и благочестии и вся благопотребная душам и телесем.
О, сродницы наши и Небеснии граждане! Вознесите молитвы ваша ко Творцу всех и Зиждителю, да избавит нас от труса, потопа, огня и иных бед и напастей, да низпошлет дожди благовременны ко умножению плодов земных и дарует вся, яже к жизни временней и вечному спасению полезная. Оградите нас от падений греховных и научите истинному покаянию, да, избавльшеся от пленения диавольскаго и всякаго действа душевреднаго, в чистоте богоугодне поживем и сподобимся Небеснаго Царствия, идеже вкупе с вами прославим Отца и Сына и Святаго Духа, ныне и присно, и во веки веков. Аминь.