Неделя 31-я по Пятидесятнице, по Рождестве Христовом. Глас 6-й

Поста нет

Воскресные

Тропарь, глас 6
А́нгельския си́лы на гро́бе Твое́м,/ и стрегу́щии омертве́ша,/ и стоя́ше Мари́я во гро́бе,/ и́щущи Пречи́стаго Те́ла Твоего́./ Плени́л еси́ а́д, не искуси́вся от него́;/ сре́тил еси́ Де́ву, Да́руяй живо́т.// Воскресы́й из ме́ртвых, Го́споди, сла́ва Тебе́.

Кондак, глас 6
Живонача́льною дла́нию/ уме́ршия от мра́чных удо́лий,/ Жизнода́вец, воскреси́в все́х Христо́с Бо́г,/ воскресе́ние подаде́ челове́ческому ро́ду:/ е́сть бо все́х Спаси́тель,// Воскресе́ние и Живо́т, и Бо́г все́х.

Рождества Христова

Тропарь, глас 4
Рождество́ Твое́, Христе́ Бо́же наш,/ возсия́ ми́рови свет ра́зума,/ в нем бо звезда́м служа́щии,/ звездо́ю уча́хуся,/ Тебе кла́нятися Со́лнцу Пра́вды,/ и Тебе́ ве́дети с высоты́ Восто́ка: // Го́споди, сла́ва Тебе́.

Кондак, глас 3
Де́ва днесь Пресу́щественнаго ражда́ет,/ и земля́ верте́п Непристу́пному прино́сит,/ А́нгели с па́стырьми славосло́вят,/ волсви́ же со звездо́ю путеше́ствуют:/ нас бо ра́ди роди́ся// Отроча́ Мла́до, Преве́чный Бог.

Праведному Иосифу Обручнику, Давиду царю и Иакову, брату Господню

Тропарь, глас 2
Благовеству́й, Ио́сифе,/ Дави́ду чудеса́ Богоотцу́,/ Де́ву ви́дел еси́ ро́ждшую,/ с па́стырьми славосло́вил еси́,/ с волсви́ поклони́лся еси́,/ А́нгелом весть прие́м;/ моли́ Христа́ Бо́га// спасти́ ду́ши на́ша.

Кондак, глас 3
Весе́лия днесь Дави́д исполня́ется Боже́ственный,/ Ио́сиф же хвале́ние со Иа́ковом прино́сит,/ вене́ц бо сро́дством Христо́вым прие́мше,/ ра́дуются и неизрече́нно на земли́ Ро́ждшагося воспева́ют, и вопию́т:// Ще́дре, спаса́й Тебе́ чту́щия.

Апостолу Иакову, брату Господню по плоти

Молитва
О, вели́кий, богоизбра́нный и богопросла́вленный апо́столе Иа́кове, бра́те Госпо́день, вели́кий архиере́ю свята́го гра́да Иерусалима, те́плый наш засту́пниче и хода́таю, предстоя́й престо́лу Пресвяты́я Тро́ицы! Не отри́ни нас от твоего́ заступле́ния, воздви́гни из глубины греховныя и, яко име́яй власть вяза́ти и реши́ти, разреши́ зол на́ших соу́зы, любви Бо́жией причти́ и Ца́рствия Небе́снаго прича́стники моли́твами твои́ми соде́лай. Моли́, святе, Христа́ Спа́са, да сподо́бит непреткнове́нно соверша́ти на́ше земно́е стра́нствие, да, ве́чныя и блаже́нныя жи́зни на Небеси́ сподо́бившеся, вку́пе с тобо́ю возмо́жем непрестанно славити Тро́ицу Неразде́льную и воспева́ти еди́но Божество́ Отца́ и Сы́на и Ду́ха Свята́го во ве́ки веко́в. Ами́нь.

Праведному Иосифу, Обручнику Пресвятой Богородицы

Молитва
О, святы́й пра́ведный Ио́сифе! Ты́ еще́ на земли́ сы́й, ве́лие име́л еси́ дерзнове́ние к Сы́ну Бо́жию, и́же благоизво́ли именова́ти тя́ Отца́ Своего́, я́ко обру́ченика Своея́ Ма́тери, и послу́шати тя́: ве́руем, я́ко ны́не с ли́ки пра́ведных во оби́телех небе́сных водворя́яся, услы́шан бу́деши во вся́ком твое́м проше́нии к Бо́гу и Спаси́телю на́шему. Те́мже, ко твоему́ покро́ву и заступле́нию прибега́юще, смире́нно мо́лим тя́: я́коже са́м от бу́ри сумни́тельных помышле́ний изба́влен бы́л еси́, си́це изба́ви и на́с, волна́ми смуще́ний и страсте́й обурева́емых: я́коже огражда́л еси́ Всенепоро́чную Де́ву от клеветы́ челове́ческия, огради́ и на́с та́кожде от вся́кия клеветы́ напра́сныя: я́коже храни́л еси́ от вся́каго вре́да и озлобле́ния воплоти́вшагося Го́спода, си́це сохраня́й твои́м заступле́нием Це́рковь Его́ правосла́вную и все́х на́с от вся́каго озлобле́ния и вре́да. Ве́си, свя́тче Бо́жий я́ко и Сы́н Бо́жий во дне́х пло́ти Своея́ в теле́сных потре́бах ну́жду име́яши, и ты́ послужи́л еси́ и́м: того́ ра́ди мо́лим тя́, и на́шим вре́менным ну́ждам благопоспеши́ твои́м хода́тайством, подая́ на́м вся́ блага́я, в житии́ се́м потре́бная. Изря́днее же про́сим тя́, исхода́тайствуй на́м оставле́ние грехо́в прия́ти от нарече́ннаго ти́ Сы́на, Единоро́днаго же Сы́на Бо́жия, Го́спода на́шего Иису́са Христа́ и досто́йны бы́ти насле́дия Ца́рства Небе́снаго на́с предста́тельством твои́м сотвори́, да и мы́, в го́рних селе́ниих с тобо́ю водворя́ющеся, просла́вим Еди́наго Триипоста́снаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.

14000-м мученикам младенцам, от Ирода в Вифлиеме убиенным

Тропарь, глас 1
Боле́зньми святы́х, и́миже о Тебе́ пострада́ша,/ умоле́н бу́ди, Го́споди,/ и вся на́ша боле́зни исцели́,// Человеколю́бче, мо́лимся.

Кондак, глас 6
В Вифлее́ме ро́ждшуся Царю́, волсви́ от Перси́ды с да́ры прихо́дят,/ звездо́ю свы́ше наставля́еми,/ но И́род смуща́ется и пожина́ет младе́нцы, я́ко пшени́цу,/ и рыда́ет себе́,// я́ко держа́ва его́ вско́ре разори́тся.

Ин кондак, глас 4
Звезда́ волхвы́ посла́ к Ро́ждшемуся,/ и И́род непра́ведное во́инство посла́ лю́то,/ уби́ти мня во я́слех// я́ко Младе́нца лежа́ща.

Преподобному Маркеллу Апамейскому

Тропарь, глас 8
В тебе́, о́тче, изве́стно спасе́ся, е́же по о́бразу:/ прии́м бо Крест, после́довал еси́ Христу́/ и, де́я, учи́л еси́ презира́ти у́бо плоть, прехо́дит бо,/ прилежа́ти же о души́, ве́щи безсме́ртней.// Те́мже и со А́нгелы сра́дуется, преподо́бне Марке́лле, дух твой.

Кондак, глас 8
Я́ко звезда́, красно́ сия́я,/ от Ефе́са провозсия́л еси́ нам, всеблаже́нне, пости́жно,/ и доброде́тельми возгреме́л еси́,/ наста́вник и́ноком мно́гим быв, преподо́бне,/ того́ ра́ди и ца́рствующий град просвети́л еси́,/ и сего́ ра́ди вопие́м ти:// ра́дуйся, о́тче всеблаже́нне Марке́лле.

Преподобному Василиску Сибирскому

Тропарь, глас 4
Я́ко изде́тска Христа́ возлюби́в, преподо́бне, Тому́ любо́вию чрез все́ житие́ после́довал еси́. В пусты́ню Сиби́рскую всели́вся, непреста́нную моли́тву Христу́ возлю́бленному приноси́л еси́. Помина́й на́с, ча́д твои́х, преподо́бне Васили́сче, с любо́вию притека́ющих к тебе́ и чту́щих святу́ю па́мять твою́.

Ин тропарь, глас 8
Земли́ Сиби́рския процвете́ние,/ ю́же безмо́лвия по́двигом озари́л еси́,/ житие́ пусты́нное до конца́ возлюби́в, блаже́нне,/ и, я́ко би́сер многоце́нный,/ серде́чныя моли́твы да́р от Го́спода стяжа́л еси́,/ и на́м в насле́дие сие́ сокро́вище яви́л еси́,/ да во спасе́ние его́ прие́млюще, вопие́м ти́:// преподо́бне Васили́сче о́тче на́ш.

Кондак, глас 2
Возложи́х себе́ от ра́нней ю́ности, да́же из де́тства твоего́, преподо́бне о́тче Васили́сче, после́довал еси́ Христу́, любо́вию возгрева́яся и моли́тву непреста́нную чрез все́ житие́ Тому́ приноси́л еси́. Те́м же Госпо́дь упоко́и и се́рдце твое́, моли́твенника вели́ка яви́, гре́шным непостижи́маго.

Ин кондак, глас 4
Пусты́нею ди́кою от сла́вы мирски́я утае́нный,/ у́мнаго де́лания высоты́ смире́нием дости́гл еси́:/ те́плою любо́вию ко Христу́ простира́яся,/ моли́твенную сла́дость я́ко ми́ро се́рдцем источа́л еси́,/ те́мже боже́ственная благода́ть в тебе́ явля́емая/ облиста́ всея́ Сиби́ри концы́,/ пустынножи́телю Васили́сче,/ моли́ всеще́драго Бо́га// души́ спасе́ние на́м дарова́ти.

Преподобному Марку гробокопателю, Печерскому в Ближних пещерах

Тропарь, глас 1
Умертви́в плотски́я по́хоти мно́гим воздержа́нием/ и копа́нием гробо́в святы́м,/ при́сно, а́ки мертв, в пеще́ре живя́,/ ме́ртвыя повеле́нием свои́м воздвиза́л еси́,/ Ма́рко прехва́льне,/ мертви́ и на́ша мудрова́ния плотска́я/ и наста́ви нас на тече́ние доброде́телей,// моля́ о нас Еди́наго Человеколю́бца.

Кондак, глас 8
Врача́ изря́дна и чудотво́рца любо́вию, ве́рнии, ублажи́м, прося́ще его́:/ да моли́твами свои́ми уврачу́ет на́ша стра́сти, душе́вныя и теле́сныя,/ и́мать бо на сие́ благода́ть от Бо́га,/ и прого́нит ду́хи лука́выя от всех, ве́рно ко гро́бу его́ притека́ющих и зову́щих:// ра́дуйся, Ма́рко, цели́телю не́мощей на́ших.

Преподобному Лаврентию Черниговскому, чудотворцу

Тропарь, глас 4
От ю́ности Христа́ возлюби́л еси́,/ и Тому́ те́сным путе́м после́дуя,/ сосу́д избра́н Ду́ха Свята́го бы́в,/ да́р чудотворе́ния и прозре́ния восприи́м:/ сего́ ра́ди в невече́рнем све́те Пресвяты́я Тро́ицы при́сно ра́дуяся,/ помина́й ча́д твои́х,// Лавре́нтие преподо́бне, о́тче на́ш.

Ин тропарь, глас 8
Дне́сь све́тло красу́ется гра́д Черни́гов,/ и торжеству́ет оби́тель Пресвяты́я Тро́ицы,/ в не́й бо моли́твою и посто́м пребыва́я,/ и́ночествующим и ве́рным лю́дем ве́лий наста́вниче и ско́рый помо́щниче,/ и избра́нник пречу́дный Цари́цы Небе́сныя яви́лся еси́,/ я́ко звезда́ лучеза́рная в стране́ Росси́йстей,/ преподо́бне о́тче на́ш Лавре́нтие,// моли́ Человеколю́бца Бо́га спасти́ ду́ши на́ша.

Кондак, глас 4
Ми́р оста́вив, чистоту́ а́нгельскую стяжа́в/ и ми́рови любо́вию послужи́в,/ о́тче на́ш Лавре́нтие,/ по́мощь благода́тную с ве́рою приходя́щим оби́льно явля́я:/ те́мже и в преми́рная селе́ния досто́йно всели́вся,/ те́лом нетле́нным с на́ми пребыва́еши,/ утвержда́я на́с в правосла́вней ве́ре отце́в на́ших,/ душе́ю светоза́рною Пода́телю ми́ра мо́лишися// дарова́ти на́м ми́р и ве́лию ми́лость.

Ин кондак, глас 4
Возсия́л еси́, яко свети́льник лучеза́рный,/ услы́ша гла́с Цари́цы Небе́сныя,/ и после́довав невозвра́тно зо́ву Ея́./ Прише́л в оби́тель Пресвяты́я Тро́ицы,/ иде́же Влады́чицы Богоро́дицы чудотво́рная ико́на,/ целому́дренно собра́в ста́до слове́сных ове́ц./ Не забу́ди и на́с, после́довавших ти́,/ и да изба́вит Госпо́дь гее́нны ве́чныя,/ соверша́ющих святу́ю па́мять твою́,// преподо́бне о́тче на́ш Лавре́нтие.

Молитва
О, всехва́льный о́тче Лавре́нтие, приими́ сие́ ма́лое моле́ние, от на́с гре́шных тебе́ приноси́мое, и при́зри ми́лостивно с высо́т небе́сных на на́с, прося́щих твоего́ хода́тайства у Престо́ла Пресвяты́я Тро́ицы, да пода́ст твои́ми моли́твами ми́р и благоде́нствие стране́ на́шей, па́стырем си́лу в моли́тве, и́ноком подкрепле́ние на пути́ соверше́нства в по́двизех смире́ния и послуша́ния, вдови́цам и сирота́м заступле́ние, немощны́м подкрепле́ние, неду́гующим ду́хом и душе́ю от бесо́в избавле́ние, больны́м исцеле́ние, путеше́ствующим А́нгела Храни́теля. Все́м чту́щим с любо́вию па́мять твою́, ве́ру и́скреннюю и непоколеби́мую. И по преставле́нии в жи́знь ве́чную приведи́ на́с ко Христу́ твои́ми моли́твами, да с тобо́ю прославля́ем Святу́ю Тро́ицу: Отца́ и Сы́на и Свята́го Ду́ха, всегда́, ны́не и при́сно, и во ве́ки веко́в. Ами́нь.

Священномученикам Павлу Аношкину и Григорию Смирнову, Мокинским

Тропарь, глас 5
Честно́е страда́ние ва́ше/ за ве́ру святу́ю Правосла́вную/ к весе́лию духо́вному вся лю́ди созыва́ет,/ священному́ченицы, Па́вле и Григо́рие,/ вы бо, зе́млю Пе́рмскую кровьми́ свои́ми освяти́вше,/ любви́ соверше́нней науча́ете,/ ду́шу полага́ти за Христа́, Бо́га на́шего,// Све́том Воскресе́ния мир обнови́вшаго.

Кондак, глас 3
Па́стырю до́брый Па́вле/ и святоле́пнаго служе́ния рачи́телю Григо́рие,/ па́ству ва́шу сло́вом просвети́вшии,/ святы́ни Це́ркве Христо́вы зело́ возлюби́вшии/ и ве́ры ра́ди смерть му́ченическую прие́мшии,/ ны́не зе́млю Пе́рмскую благода́тию просвеща́ете/ и святы́ня ея́ быва́ете,/ мощми́ свои́ми безсме́ртие пропове́дающе// и исцеле́ния точа́ще всем, с ве́рою к вам притека́ющим.

Молитва
О, новому́ченицы сла́внии, иере́ю Па́вле и диа́коне Григо́рие! Днесь, ве́рно соше́дшеся, восхваля́ем честна́я страда́ния ва́ша, я́же в годи́ну тя́жкую гоне́ний на Це́рковь Ру́сскую претерпе́сте. Почита́ем и бра́тскую любо́вь ва́шу, ве́ры бо нра́вом связу́еми, я́ко единоду́шнии сослужи́телие, согла́сно и му́ки за Христа́ прия́сте. Ублажа́ем любо́вь ва́шу, псалмопе́вца бо глаго́лы в час испыта́ния воспомяну́сте, я́ко добро́ и красно́ жи́ти бра́тии вку́пе, бла́го же есть и в Ца́рствии Небе́снем вку́пе ра́доватися. Диви́мся долготерпе́нию ва́шему, ни мраз бо, ни ра́ны, ни коньми́ истяза́ние от Бо́га вас разлучи́ша. Покланя́емся честны́м моще́м ва́шим, до вре́мене под спу́дом земны́м сокрове́нным, напосле́док же, я́ко не́кий дар светоно́сный, всей земли́ Пе́рмстей возсия́вшим. Ны́не моли́те Великодарови́таго Бо́га, явле́нием моще́й ва́ших нас, недосто́йных, Почти́вшаго, да проба́вит моли́твами ва́шими ми́лость Свою́ ве́дущим ве́ру Правосла́вную, да обрати́т к ней отпа́дшия, да укрепи́т ве́рныя в стоя́нии за пра́вду Бо́жию, да сподо́бит нас от моще́й ва́ших почерпну́ти исцеле́ний Боже́ственное де́йство, благода́ть и ми́лость, и да да́рует нам еди́неми усты́ и еди́нем се́рдцем сла́вити и воспева́ти Пречестно́е и Великоле́пое И́мя, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.