Святитель Филофе́й (в схиме Фео́дор), митрополит Тобольский

Молитва
О преславный святителю отче наш Филофее, землю Сибирскую светом истиннаго просвещения озаривый и народы зде живущия ко Христу Богу приведый, архиерею святый, веры православныя проповедниче ревностный! Добрым житием твоим образ послушания и смирения показавый учитель благочестия явился еси. Пастве сибирстей яви тя Всеблагий Господь мужа мудра и совершенна, заступника усердна, просвещения духовнаго начальника, храмов Божиих и обителей иноческих искуснаго создателя и устроителя.
Ныне припадающе ко святым мощем твоим со умилением молим тя: помози нам, чадам твоим, в міре сем скорбнем время жития своего во страсе Божии проводити; даруй нам в вере православней утверждение, греховныя жизни исправление, непрестанныя молитвы памятование, вражды прекращение, міра умирение; немощным подаждь здравие и в болезнех терпение; отроком и младенцем в добром житии возрастание, родителем и наставником послушание; монашествующим споспешествуй в постническом и смиренном жительстве благодать Духа Святаго стяжати, священству подаждь ревность святую по Бозе и любовь к пастве своей, юже ты стяжал еси в житии твоем.
О святителю предивный, архипастырю благий и смиренный отче наш Филофее! Услыши моления наша и буди нам заступник и присный ходатай пред Богом, да молитвами твоими сподобимся достигнути обителей небесных, идеже ты со всеми святыми непрестанно славословиши Святую Троицу, Отца и Сына и Святаго Духа, ныне, и присно, и во веки веков. Аминь.

2-я Молитва
О пречестная и священная главо и благодати Святаго Духа исполненная, делателю Христов неутомимый и молитвенниче изрядный, теплый заступниче, святителю отче наш Филофее! Предстоя престолу Вседаровитаго Царя и наслаждаяся света Единосущныя Троицы, и дерзновение имея ко Всемилостивому Владыце, моли Его о православней стране нашей и спасении людей ея; да дарует архиереем святительства украшение и о пастве своей неусыпное попечение, священству во благоговейном служении пребывание, монашествующим в делании духовном вспоможение, воинству нашему во бранех укрепление и людем Своим в вере утверждение и спасение.
О великий сибирский святителю, молитвами твоими сохрани обитель сию, град сей и вся грады и веси страны Сибирския и живущия в них от глада, огня, пагубы, нашествия иноплеменных, старыя и вдовицы утеши, юныя настави, неведующия Христа люди умудри, сироты заступи, младенцы воспитай, плененныя возврати, болящия исцели, и везде тепле призывающия тя и с верою притекающия к раце честных мощей твоих, и молящияся тебе от всяких напастей и бед ходатайством твоим свободи.
Святителю отче наш Филофее, сибирския земли заступниче и всем верным добрый наставниче, моли о нас Всещедраго и Человеколюбиваго Христа Бога нашего, да и в день страшнаго Суда Божия осуждения и муки избавит нас, и радость общения сотворит со всеми святыми во веки веков.