Неделя 5-я по Пятидесятнице. Глас 4-й

Поста нет

Воскресные

Тропарь, глас 4
Све́тлую воскресе́ния про́поведь/ от А́нгела уве́деша Госпо́дни учени́цы/ и пра́деднее осужде́ние отве́ргша,/ апо́столом хва́лящася глаго́лаху:/ испрове́ржеся сме́рть,/ воскре́се Христо́с Бо́г,// да́руяй ми́рови ве́лию ми́лость.

Кондак, глас 4
Спа́с и Изба́витель мо́й/ из гро́ба, я́ко Бо́г,/ воскреси́ от у́з земноро́дныя,/ и врата́ а́дова сокруши́,// и я́ко Влады́ка воскре́се тридне́вен.

Собору славных и всехвальных 12-ти апостолов

Тропарь, глас 4
Апо́столов первопресто́льницы/ и вселе́нныя учи́телие,/ Влады́ку всех моли́те/ мир вселе́нней дарова́ти// и душа́м на́шим ве́лию ми́лость.

Кондак, глас 2
Ка́мень Христо́с ка́меня ве́ры прославля́ет све́тло,/ ученико́в преизря́дна,/ и с Па́влом весь дванадесяточи́сленный собо́р днесь;/ и́хже па́мять соверша́юще ве́рно,// сих Просла́вльшаго прославля́ем.

Ин кондак, глас 2
Петра́, ве́рнии, ка́меня ве́ры, похва́лим/ и Па́вла Богому́драго,/ созыва́ют бо всех пра́здновати ве́рою,/ собо́рне вку́пе вся двана́десяте, я́ко пропове́дники ве́ре,// прося́ща грехо́в оставле́ния.

Преподобному Петру, царевичу Ордынскому, Ростовскому чудотворцу

Тропарь, глас 8
Оте́чества своего́, блаже́нне Пе́тре, удали́вся,/ и богоме́рзкую ве́ру отню́д возненави́дев,/ от тьмы́ во свет прише́л еси́,/ и всели́лся еси́ во сла́вный и многонаро́дный град Росто́в,/ в не́мже житие́ че́стно пожи́в,/ це́рковь во и́мя святы́х апо́стол Петра́ и Па́вла воздви́гл еси Христо́вою благода́тию,/ и сию́ чу́дными ико́нами, я́ко неве́сту украси́в,/ святи́теля же, и кня́зя, и вся лю́ди житие́м свои́м удиви́л еси́,/ те́мже и по сме́рти твое́й Христо́с да́ром чуде́с обогати́ тя./ Помина́й нас чту́щих пресве́тлую па́мять твою́, преподо́бне о́тче Пе́тре,// и моли́ Христа́ Бо́га, спасти́ся душа́м на́шим.

Кондак, глас 4
Яви́ся ве́лие со́лнце Христо́вой Це́ркви,/ просвеща́я уче́ния светлостьми́, всече́стне,/ я́ко черпа́лом златы́м,/ от кла́дязя неиско́паннаго чуде́с поче́рпл еси́,/ от исто́чника неистощи́маго,/ на па́мять успе́ния твоего́ прише́дшим, всеблаже́нне Пе́тре,// ны́не всем подава́еши грехо́в проще́ние, сла́во преподо́бным.

Молитва
О, преподо́бне Пе́тре царе́виче, Росто́вский чудотво́рче! Я́коже из мра́ка язы́ческаго во свет Ева́нгельскаго уче́ния Госпо́дь тя призва́, та́ко умоли́ Его́, да и нас по неизрече́нней Свое́й бла́гости и человеколю́бию и́змет всеси́льною Свое́ю десни́цею из тьмы грехо́вныя, и осия́ет сердца́ на́ша к де́ланию Его́ Боже́ственных за́поведей. Я́коже ты избе́г мяте́жа мирски́х волне́ний, во ангелоподо́бное безпеча́льное житие́ сподо́бился еси́ дости́гнути, та́ко сподо́би и нам гре́шным мо́ря сего́, вла́емаго страстьми́, пучи́ну безмяте́жно преплы́ти, име́я тя, о́тче, ко́рмчаго о Го́споде на́шем, и дости́гнути чи́стым покая́нием ко приста́нищу спасе́ния ве́чнаго. И я́коже име́л еси́ споспе́шников тебе́ верхо́вных апо́столов Петра́ и Па́вла в созида́нии оби́тели, та́ко подви́гни их умилосе́рдитися и о нас недосто́йных, и дарова́ти нам от сугу́быя апо́стольския бла́гости дерзнове́ние ко Христу́ Бо́гу. Ве́руем бо, я́ко а́ще мо́щи твоя́ святы́я и сокрове́нны в земли́, но ты ца́рствуеши со избра́нными Бо́жиими на Небеси́: исхода́тайствуй у́бо, да и нам гре́шным моли́твами твои́ми отве́рзется дверь Ца́рствия Небе́снаго в безконе́чныя ве́ки. Ами́нь.

2-я Молитва
О, преподо́бне о́тче Пе́тре царе́виче, душе́ю на Небеси́ Престо́лу Бо́жию предстои́ши и Тро́ичныя сла́вы наслажда́ешися, те́лом же на земли́ в Боже́ственном хра́ме сем почива́яй, и да́нною ти свы́ше благода́тию разли́чная источа́яй чудеса́, при́зри ми́лостивым о́ком на предстоя́щия честне́й твое́й ра́це лю́ди и прося́щия уми́льно твоея́ по́мощи; се бо мы безме́рными согреше́нии пра́ведный гнев Бо́жий на ся наведо́хом и вся́кия ми́лости недосто́йни сотвори́хомся; тем же не сме́юще вознести́ очеса́ на́ша к высоте́ небе́сней, ниже́ вознести́ моле́бный глас ко Го́споду, се́рдцем сокруше́нным и смире́нным ду́хом тебе́ в хода́тайство и на по́мощь призыва́ем, испроси́ у Го́спода Це́ркви благостоя́ние, возду́ха благорастворе́ние, земли́ плодоно́сие; изба́ви всех, ве́рою несомне́нною к Бо́гу приходя́щих и к ра́це моще́й твои́х прибега́ющих, от вся́ких бед душе́вных и теле́сных; бу́ди печа́льным уте́шитель, неду́гующим врач, напа́ствуемым помо́щник, вдови́цам засту́пник, си́рым защи́тник, младе́нцам пита́тель, стра́нствующим путево́ждь, ста́рым укрепле́ние, пла́вающим ко́рмчий; исхода́тайствуй всем, твоея́ по́мощи тре́бующим, вся, я́же ко спасе́нию поле́зная, я́ко да твои́ми моли́твами наставля́еми, путь маловре́меннаго жития́ бе́збедне соверши́м, улучи́м на Небеси́ ве́чный поко́й и просла́вим всех благи́х Да́теля, в Тро́ице сла́вимаго Бо́га, Отца́ и Сы́на и Свята́го Ду́ха, ны́не и при́сно и во ве́ки веко́в, ами́нь.

Святителю Софронию, архиепископу Иркутскому

Тропарь, глас 4
От ю́ности Христа́ возлюби́л еси́, блаже́нне Софро́ние,/ до́бре упра́вил еси́ и́ноческия оби́тели/ и, архиере́йства са́ном почте́н быв,/ упа́сл еси́ Ирку́тскую па́ству,/ те́мже и по преставле́нии дарова́ния чуде́с от Бо́га прия́л еси́,/ и мо́лиши Христа́ Бо́га// изба́вити нас от бед и спасти́ ду́ши на́ша.

Ин тропарь, глас 1
Ско́рый в беда́х и ско́рбех засту́пниче,/ о́тче иера́рше страны́ Сиби́рския,/ святи́телю Софро́ние,/ на Небеси́ предстоя́й с первоиера́рхом Ирку́тския Це́ркве и все́ми святы́ми,/ вы́ну и́маши благоволе́ние Го́спода сла́вы,/ при́зри на лю́ди, притека́ющия к честны́м оста́нкам святы́х моще́й твои́х,/ с ве́рою и любо́вию сле́зно прося́щия твоея́ по́мощи и заступле́ния,/ моли́, Его́же пропове́дал еси́ лю́дем Сиби́ри,/ изба́вити я́ от находя́щих зол и наве́тов вра́жиих,/ просвети́ти люде́й олядене́вшая дре́вле неве́рием сердца́,/ дарова́ти утвержде́ние ве́ры Христо́вы// и спасти́ ду́ши на́ша.

Кондак, глас 4
Соиме́ннаго му́дрости иера́рха,/ изря́дное Це́ркве Ирку́тския украше́ние,/ отца́ на́шего святи́теля Софро́ния любо́вию восхва́лим вси ве́рнии,/ той бо есть храни́тель гра́да и страны́ сея́// и моли́твенник о душа́х на́ших.

Ин кондак, глас 3
Па́стырей Нача́льнику, Христу́,/ труди́лся еси́, святи́телю Софро́ние,/ на па́жити духо́вней се́верныя страны́ на́шея,/ язы́цы монго́льстии от пре́лести и скве́рны и́дольския избавля́я,/ приве́л еси́ я́ к све́ту ве́ры Христо́вой,/ и ны́не, со А́нгелы Влады́чню Престо́лу предстоя́,/ моли́ непреста́нно о всех нас,// изба́вити ны от бед и спасти́ ду́ши на́ша.

Молитва
О, Свя́тче Бо́жий, святи́телю Христо́в, до́брый па́стырю слове́снаго ста́да, челове́че Бо́жий, но́вый чудотво́рче и неусы́пный к Бо́гу моли́твенниче за страну́ сию́, о́тче Софро́ние, при́зри с высоты́ Небе́сныя на нас, с ве́рою и любо́вию покланя́ющихся о́бразу твоему́ и честны́м оста́нкам святы́х моще́й, в на́ше утеше́ние избы́вшим от всепояда́ющаго огня́. При́зри, свя́тче Бо́жий, и виждь на́ше нестрое́ние и раздо́ры, на́шу ту́гу, скорбь и серде́чную боле́знь, от лише́ния бра́тския любве́ пребыва́ющия. Испроси́ у Христа́ Бо́га коему́ждо нам благода́ти смире́ния, позна́ние своея́ грехо́вности и самоукоре́ния, да, внима́юще ки́йждо свое́й со́вести, преста́нем осужда́ти бли́жняго, клевета́ти и поноша́ти, но, соедини́вшеся друг ко дру́гу любо́вию, сподо́бимся ми́рно во смире́нии про́чее вре́мя живота́ на́шего пожи́ти и улучи́ти христиа́нскую кончи́ну. Да, совоку́пльшеся в бу́дущей жи́зни со все́ми святы́ми и с тобо́ю, па́стырю наш, просла́вим Еди́наго в Тро́ице сла́вимаго Бо́га, Отца́ и Сы́на и Свята́го Ду́ха во ве́ки веко́в. Ами́нь.

Собору святых Биробиджанской епархии

Тропарь, глас 4
Днесь ликовству́ет град Биробиджа́н/ и земля́ Дальневосто́чная ра́дуется,/ соверша́ющи па́мять досточу́дных святы́х,/ в сих преде́лех Бо́гу угоди́вших и за Христа́ пострада́вших,/ ти́и бо ны́не в черто́зех све́тлых на Небеси́/ Престо́лу Бо́жию предстоя́т// и моля́тся о спасе́нии душ на́ших.

Кондак, глас 3
Све́том Христо́вым просвети́вшеся/ и мно́гими доброде́тельми обогати́вшеся,/ правосла́вную ве́ру испове́дасте/ и да́же до сме́рти пострада́сте,/ новому́ченицы и страстоте́рпцы сла́внии,/ те́мже в ве́ре и благоче́стии нас утверди́те,/ о го́рнем помышля́ти научи́те,/ от искуше́ний и бед изба́вите,/ да с любо́вию к вам взыва́ем:// ра́дуйтеся, земли́ Среднеаму́рския те́плии предста́телие.

Молитва
О ди́внии и прему́дрии уго́дницы Христо́вы, в земли́ Среднеаму́рстей просия́вшии и за Христа́ пострада́вшии! Ны́не почита́юще святу́ю па́мять ва́шу, мы, гре́шнии и недосто́йнии, к вам усе́рдно прибега́ем и во умиле́нии серде́ц на́ших взыва́ем: услы́шите моле́ние на́ше и не оста́вите нас свои́м предста́тельством пред Бо́гом, вы бо па́че всех благ земны́х Сладча́йшаго Го́спода Иису́са Христа́ возлюби́ли есте́ и, благода́тию Боже́ственною ду́ши напита́вше, Тому́ чрез все житие́ ре́вностно после́довали есте́. Испроси́те нам у Милосе́рднаго Бо́га благода́ть, просвеща́ющую и укрепля́ющую нас, да, е́ю осеня́еми, в ве́ре, благоче́стии и любви́ преуспева́ти бу́дем и Христу́ чрез бли́жних на́ших служи́ти неле́ностно потщи́мся. Моли́те Спа́са на́шего, да сподо́бит нас стра́нствие земно́е непреткнове́нно соверши́ти, в ми́ре и покая́нии житие́ сконча́ти, тве́рдость во испове́дании правосла́вныя ве́ры яви́ти, да, благоче́стно пожи́вше, на Стра́шнем Суде́ предстоя́ния одесну́ю Го́спода на́шего Иису́са Христа́ сподо́бимся, Ему́же со Отце́м и Святы́м Ду́хом подоба́ет вся́кая сла́ва, честь и поклоне́ние, ны́не и при́сно, и во ве́ки веко́в. Ами́нь.

Собору Тверских святых

Тропарь, глас 4
И́же в земли́ Тверско́й просла́вльшиися,/ святи́телие, му́ченицы,/ преподо́бнии, пра́веднии/ и вси святи́и,/ ве́рою, по́двиги благоче́стия,/ любо́вию, кро́тостию, сло́вом и житие́м/ Бо́гу благоугоди́вшии/ и венцы́ нетле́ния и сла́вы украси́вшиися,/ моли́те Христа́ Бо́га на́шего/ дарова́ти мир стране́ на́шей// и душа́м на́шим в ми́ре спасти́ся.

Кондак, глас 4
На земли́ благоче́стно пожи́вшии,/ святи́и, в земли́ Тверско́й просия́вшии,/ и ны́не на Небесе́х со А́нгелы ра́дуетеся/ и Тро́ицу Святу́ю — Отца́, и Сы́на, и Свята́го Ду́ха во Еди́ном Божестве́ прославля́ете./ Мы же, земноро́днии, моли́твенно ублажа́юще вас/ и святу́ю па́мять соверша́юще, мо́лим:/ принеси́те на́ша моли́твы к Небе́сному Престо́лу Го́спода Вседержи́теля,/ да ва́шим хода́тайством// да́рует мир и спасе́ние душа́м на́шим.

Величание
Велича́ем вас,/ страны́ Тверски́я покрови́тели,/ и чтим святу́ю па́мять ва́шу,/ вы бо мо́лите о нас// Христа́, Бо́га на́шего.

Пресвятой Богородице пред иконой Ея «Балыкинской» («Волынской»)

Тропарь, глас 4
Засту́пнице земли́ Росси́йския/ от наше́ствия Све́йскаго/ и непреста́нная за нас Моли́твеннице,/ мир земли́ и душа́м на́шим у Го́спода испроси́,// да святи́тся в нас и́мя Бо́жие во ве́ки.

Молитва
О, Ма́ти Бо́жия, не́когда от наше́ствия инове́рных све́ев в вели́цей беде́ Оте́честву на́шему бы́вшу, яви́ла еси́ всемо́щное заступле́ние прославле́нием в стране́ Се́верстей всечестна́го о́браза Твоего́, имену́емаго Балы́кинским, и зри́мыми на не́м слеза́ми оче́с Твои́х умоли́ла Сы́на Твоего́ и Бо́га на́шего дарова́ти правосла́вным Христиа́ном пресла́вную побе́ду и одоле́ние на супоста́ты. Ты́, Премилосе́рдная Ма́ти, и в мимоше́дшия дни́ во гра́де Орле́ пред Пречи́стым о́бразом Твои́м дарова́ла исцеле́ние стра́ждущей от ду́ха нечи́стаго деви́це, возврати́в ю́ роди́телем здра́ву и невреди́му.
Ты́, ско́рая Помо́щнице в беда́х челове́ческих, услы́шала во́пль ма́тери де́тища, с высоты́ жили́ща внеза́пу спа́дша, и возста́вила е́ здра́во и безвре́дно. Ты́, неизсяка́емый исто́чниче чуде́с и щедро́т, принесенной к ди́вному о́бразу Твоему́ отрокови́це зело́ разслабленной благоизво́лила дарова́ти ско́рое исцеле́ние, укрепи́в плесне́ ея́ к жела́нному хожде́нию. Ты́, всемо́щная Цари́це не́ба и земли́, воздви́гла от неисце́льнаго неду́га младе́нцев, и́х же роди́тели притеко́ша к Тебе́ с ве́рою и любо́вию.
Ты́, Пода́тельнице ми́ра душа́м на́шим, изба́вила ю́ношу от свирепе́ющих страсте́й и преклони́ла злонра́вие его́ ко благонра́вию и покорению родителям. Ты́ неоску́дно излива́ла струи́ Свое́й ми́лости на все́х, притека́ющих к пресвято́му о́бразу Твоему́ в душе́вных ско́рбех, теле́сных неду́зех и жите́йских напа́стех. Вонми́, о Всеблага́я, и ны́нешнему усе́рдному моле́нию на́шему: упра́ви пути́ земна́го стра́нствия на́шего к ми́рному и благодетельному житию́, украси́ жи́тельство на́ше благи́ми обы́чаи, загради́ всеси́льною дла́нию Твое́ю уста́ лжеучи́телей, вздымающихся на Ра́зум Бо́жий, тлящих обы́чаи правосла́вных пре́дков на́ших и развраща́ющих умы́ и се́рдца ю́ных ча́д на́ших, посли́ на́м во все́ дни́ жития́ на́шего име́ти чистоту́ по́мыслов и серде́чных движе́ний. Сама́, о, Всепе́тая, заступи́ и и́миже ве́си судьба́ми спаси́ и введи́ на́с в прерадостныя оби́тели Сы́на Твоего́ и Бо́га на́шего. Ами́нь.

Пресвятой Богородице пред иконой Ея «Горбаневской»

Тропарь, глас 4
Засту́пнице и Похвало́ земли́ на́шея Полта́вския, Пречи́стая Де́во Богоневе́сто Влады́чице! Многообра́зную благода́ть от святы́я Твоея́ ико́ны стяжа́вше, мо́лим Тя́, смире́ннии и гре́шнии: о, Всепе́тая Ма́ти Бо́га на́шего, Моли́твеннице те́плая, чуде́с и исцеле́ний пода́тельнице, не отврати́ся то́ка сле́з на́ших, но приими́ моле́ния рабо́в Твои́х; не вве́ри на́с челове́ческому предста́тельству, да не до конца́ поги́бнем от беззако́ний на́ших, но покры́й на́с всечестны́м покро́вом Твои́м, и изми́ ны́ от належа́щих на на́с бе́д и скорбе́й; моли́ Сы́на Твоего́, Христа́ Бо́га на́шего, грехо́в оставле́ние на́м дарова́ти, и жи́зни ве́чныя прича́стники бы́ти сотвори́; на Тя́ бо по Бо́зе все́ упова́ние на́ше возлага́ем, Пресвята́я Де́во.

Кондак, глас 8
Светоно́сная пала́та угото́вася Тебе́, Влады́чице, святы́й Собо́рный хра́м гра́да на́шего, в не́мже всечестна́я ико́на Твоя́, я́коже со́лнце светоза́рное возсия́. Ты́ же, Чи́стая, благодаре́ния на́ша и поклоне́ния ико́не Твое́й прие́млюще, не отверга́й на́с, призыва́ющих Тя́ с ве́рою и умиле́нием. Озари́ ду́ши на́ша све́том благода́ти Твоея́, да никто́же из притека́ющих к Тебе́ изы́дет отсю́ду то́щь и неуслы́шан. О, Богома́ти, ми́лости Исто́чниче, упра́ви пути́ жития́ на́шего и сове́ты на́ша в пра́вде, во е́же откры́тися в ни́х Ца́рствию Христо́ву; Ты́ бо еси́ Моли́твенница усе́рдная о гра́де на́шем, и земли́ на́шея Похвала́ и Покро́в.

Величание
Велича́ем Тя́, Пресвята́я Де́во, и чти́м о́браз Тво́й святы́й, его́же во утеше́ние лю́дем Твои́м и земли́ Полта́встей яви́ла еси́.

Святителю Арсению, епископу Тверскому

Тропарь, глас 8
Благоче́стно пожи́в во святи́тельстве,/ лю́ди просвети́л еси́ уче́нием твои́м,/ и о хра́ме Пречи́стыя вельми́ подвиза́вся,/ и люби́тель мона́хов быв,/ сего́ ра́ди от Христа́ па́ствы твоея́ вене́ц прия́л еси́./ Те́мже, я́ко апо́стольскаго престо́ла наме́стника,/ и святи́теля вели́каго чту́ще тя, мо́лим ча́да твоя́, блаже́нне:/ от всех бед изба́ви нас я́же ко Христу́ моли́твами твои́ми,// святи́телю Христо́в Арсе́ние, о́тче наш.

Кондак, глас 8
Восприе́мши ра́достно честны́я твоя́ мо́щи, пречи́стая це́рковь,/ в ню́же че́стно вноси́ми мно́жеством священномона́хов, и кня́зи благове́рными,/ и я́же прие́мши я́ко сокро́вище многоце́нное./ Те́мже и мы ны́не твоея́ огра́ды слове́сныя о́вцы,/ о́крест ра́ки твоея́ предстоя́ще,/ любе́зно вопие́м ти́:/ не забу́ди чад твои́х, о́тче,/ и́хже му́дре собра́л и возлюби́л еси́,/ я́ко да зове́м ти́:// ра́дуйся, святи́телю Арсе́ние, па́стырю и учи́телю наш.

Ин кондак, глас 8
Я́ко богоявле́нная росси́йская звезда́,/ днесь, сия́я чудесы́,/ яви́лся еси́, святи́телю Арсе́ние./ Тем непреста́нно моли́ся Христу́ Бо́гу о ста́де твое́м/ и сохраня́й оте́чество твое́, град же и лю́ди,/ и́же ве́рою почита́ющих честно́е пренесе́ние твое́/ и к честны́м моще́м твои́м припа́дающих со стра́хом и любо́вию целу́ющих я́./ Да вси велегла́сно зове́м ти:// ра́дуйся, Богому́дре святи́телю Арсе́ние, о́тче наш.

Молитва
При́зри от Го́рних высо́т, святи́телю о́тче Арсе́ние, на нас смире́нных и гре́шных, во умиле́нии душ и серде́ц к тебе́ прибега́ющих, ве́рою кре́пкою на тя упова́ющих, любо́вию нелицеме́рною прося́щих у тебе́ заступле́ния. Тебе́ бо моли́твенника благоприя́тнаго ве́мы ко Всеми́лостивому Бо́гу. Проле́й о нас твоя́ святы́я моли́твы и умоли́ Человеколю́бца Го́спода не погуби́ти нас со беззако́нии на́шими, но обрати́ти нас к покая́нию и исправле́нию, да про́чее вре́мя жития́ на́шего земна́го, не в рабо́те греху́ и страсте́м, но в де́лании за́поведей Его́ святы́х и в благоче́стии провожда́ем и со благо́ю наде́ждою дости́гнем кончи́ны на́шея. В час же сме́ртный наипа́че яви́ся нам, о́тче, засту́пник благи́й, ускори́ тогда́ на моли́тву о нас безпо́мощных и помози́ нам со прича́стием Та́инств Боже́ственных ми́рную и благу́ю кончи́ну улучи́ти, гро́зныя мыта́рства возду́шныя безбе́дно прейти́ и унасле́довати Го́рнее Ца́рство. Ей, святи́телю Бо́жий, не пре́зри нас и не посрами́ упова́ния на́шего, но бу́ди о нас предста́тель немо́лчный к Бо́гу. Па́стырю наш до́брый, упаси́ нас бо́дренными твои́ми моли́твами и сохрани́ ненаве́тны от вся́каго зла, да сла́вим неизрече́нное человеколю́бие Бо́га на́шего, Отца́ и Сы́на и Свята́го Ду́ха, и твое́ оте́ческое заступле́ние, во ве́ки веко́в. Ами́нь.

2-я Молитва
О, вели́кий уго́дниче Бо́жий, святи́телю о́тче Арсе́ние! Се прино́сим тебе́ хвале́бное пе́ние мы, гре́шнии и недосто́йнии ча́да твоя́, и велича́ем по́двиги и доброде́тели твоя́, и мно́гую ми́лость твою́ ко всем с ве́рою притека́ющим к оте́ческому твоему́ покро́ву. Приими́ с любо́вию приноше́ние ве́ры и любве́ на́шея, и принеси́ е́ Вседержи́телю Бо́гу, от Него́же нисхо́дит вся́кое дая́ние бла́го и вся́кий дар соверше́нный, и я́коже благоде́тельствовал еси́ в земне́м житии́ твое́м всем иска́вшим твоея́ по́мощи, та́ко и ны́не не лиши́ нас, о́тче благосе́рдый, твоего́ пред Бо́гом многомо́щнаго заступле́ния. Се бо нетле́нныя и многоцеле́бныя мо́щи твоя́ дарова́ нам Госпо́дь во увере́ние, я́ко ве́лие дерзнове́ние и́маши к Нему́ и я́ко мно́го мо́жет предста́тельство твое́ пред Престо́лом бл́агости Его́. Те́мже не оста́ви нас си́рых и безпо́мощных, но при́сно помина́й нас во святы́х небе́сных твои́х моли́твах. Укрепи́ на́ша стопы́ тве́рдо и непоколеби́мо ходи́ти путе́м за́поведей Госпо́дних, утверди́ ру́це на́ша к воздея́нию моли́твенному и к соверше́нию до́брых дел, согре́й сердца́ на́ша любо́вию ко Го́споду и к жи́зни ве́чней. Испроси́ у Царя́ Небе́снаго гра́ду Твери и святе́й оби́тели твое́й благостоя́ние и всей стране́ Росси́йстей ми́лость Бо́жию и сохране́ние от вся́каго зла. Испроси́, святи́телю Бо́жий, и всем, с ве́рою прибега́ющим к ра́це святы́х моще́й твои́х и и́мя твое́ благогове́йно призыва́ющим, коему́ждо дар благопотре́бен: неду́гующим исцеле́ние, бе́дствующим избавле́ние, печа́льным утеше́ние, заблу́ждшим и́стины позна́ние, гре́шным исправле́ние, подвиза́ющимся преспе́яние, и всем вся к жи́зни вре́менней и ве́чней потре́бная, во сла́ву ди́внаго во святы́х Свои́х Бо́га, в Тро́ице сла́вимаго и покланя́емаго, Отца́ и Сы́на и Свята́го Ду́ха. Ами́нь.

3-я Молитва
О всехва́льный святи́телю Христо́в и чудотво́рче, о́тче Арсе́ние! Не забу́ди нас, чад святы́я оби́тели твоея́ и всех с ве́рою и любо́вию прибега́ющих к ра́це честны́х и многоцеле́бных моще́й твои́х, но помина́й нас во святы́х твои́х и благоприя́тных моли́твах к Бо́гу. Моли́ за вся христиа́ны, о́тче святи́телю Арсе́ние, и за святу́ю сию́ оби́тель, ю́же вручи́ тебе́ Пречи́стая Влады́чица Богоро́дица, мним бо тя вы́ну предстоя́ща Христу́ Бо́гу на́шему и Пречи́стей Его́ Ма́тери и иму́ща ве́лие к Ним дерзнове́ние. А́ще бо те́лом и преста́вился еси́ от нас, но душе́ю жив сый, неотсту́пен пребыва́еши с на́ми ду́хом. Сохраня́й нас твои́м предста́тельством пред Престо́лом Небе́снаго Царя́ от ко́зней вра́жиих, от собла́знов ми́ра, во зле лежа́щаго, и от вся́кия ско́рби и ну́жды. О преблаги́й па́стырю и учи́телю наш, о́тче Арсе́ние! К тебе́ припа́даем и тебе́ мо́лимся, моли́ся всеси́льному Бо́гу о по́льзе душ на́ших, и испроси́ нам вре́мя на покая́ние, да очи́стившеся от вся́кия скве́рны грехо́вныя, Небе́сному Ца́рствию насле́дники сподо́бимся бы́ти со все́ми пра́ведными, от ве́ка угоди́вшими Го́споду на́шему Иису́су Христу́, Ему́же подоба́ет вся́кая сла́ва, честь и поклоне́ние со Безнача́льным Его́ Отце́м и с Пресвяты́м Ду́хом, ны́не и при́сно и во ве́ки веко́в. Ами́нь.