Седмица 15-я по Пятидесятнице. Глас 5-й

Поста нет

Священномученику Вавиле Антиохийскому

Тропарь, глас 4
И нра́вом прича́стник,/ и престо́лом наме́стник апо́столом быв,/ дея́ние обре́л еси́, богодухнове́нне,/ в виде́ния восхо́д,/ сего́ ра́ди сло́во и́стины исправля́я,/ и ве́ры ра́ди пострада́л еси́ да́же до кро́ве,/ священному́чениче Вави́ло,/ моли́ Христа́ Бо́га// спасти́ся душа́м на́шим.

Кондак, глас 8
Я́ко благоче́стия пропове́дника и страда́льцев утвержде́ние,/ Це́рковь сла́вит тя, Вави́ло сла́вне, освеща́ема днесь;/ но, я́ко име́я дерзнове́ние ко Го́споду,/ в ми́ре соверше́ннем велича́ющия и восхваля́ющия тя сохрани́ти Христу́// моли́ся, о многострада́льне.

Пророка Моисея

Тропарь, глас 2
Проро́ка Твоего́ Моисе́я па́мять, Го́споди, пра́зднующе,/ тем Тя мо́лим:// спаси́ ду́ши на́ша.

Ин тропарь, глас 2
На высоту́ доброде́телей возше́л еси́, проро́че Моисе́е;/ и сего́ ра́ди сподо́бился еси́ ви́дети сла́ву Бо́жию./ Скрижа́ли благода́тныя Зако́на прия́т,/ и начерта́ний благода́ть в себе́ нося́,/ и проро́ков был еси́ честна́я похвала́,// и благоче́стия вели́кое та́инство.

Кондак, глас 2
Лик проро́ческий с Моисее́м и Ааро́ном весе́лием днесь весели́тся,/ я́ко коне́ц проро́чествия их на нас испо́лнися;/ днесь сия́ет Крест, и́мже нас спасл еси́.// Тех моли́твами Христе́ Бо́же поми́луй нас.

Святителю Митрофану, епископу Воронежскому

Тропарь, глас 4
Пра́вило ве́ры и о́браз кро́тости,/ сло́вом и житие́м, па́стве твое́й, о́тче смиренному́дре Митрофа́не, был еси́./ Те́мже и во све́тлостех святы́х,/ со́лнца светле́йше возсия́л еси́,/ венце́м нетле́ния и сла́вы украша́емь,/ моли́ Христа́ Бо́га,// стране́ на́шей и гра́ду твоему́ в ми́ре спасти́ся.

Кондак, глас 8
Воздержа́нием те́ло ду́ху порабо́тив,/ ду́шу же равноа́нгельну сотвори́в,/ святи́тельскою оде́ялся еси́ оде́ждою, я́ко вене́ц свяще́нства,/ и ны́не, всех Влады́це предстоя́,// моли́, всеблаже́нне Митрофа́не, умири́ти и спасти́ ду́ши на́ша.

Молитва
О, святи́телю о́тче Митрофа́не, се мы гре́шнии, нетле́нием честны́х моще́й твои́х и мно́гими благодея́ньми, чуде́сно соде́янными и содева́емыми тобо́ю, уве́рившеся, испове́дуем, я́ко и́маши ве́лию благода́ть у Го́спода Бо́га на́шего, и всесмире́нно ко твоему́ благосе́рдию припа́дающе, тебе́ мо́лимся си́це: моли́ о нас Христа́ Бо́га на́шего, да низпосле́т всем чту́щим святу́ю па́мять твою́ и усе́рдно к тебе́ прибега́ющим бога́тыя ми́лости Своя́; да утверди́т во святе́й Свое́й Правосла́вной Це́ркви живы́й дух пра́выя ве́ры и благоче́стия, дух ве́дения и любве́, дух ми́ра и ра́дости о Ду́се Свя́те, да вся ча́да ея́, чи́ста су́ща от мирски́х искуше́ний и плотски́х похоте́й и зла́го де́йствия злых духо́в, ду́хом и и́стиною покланя́ются Ему́, и усе́рдно о соблюде́нии за́поведей Его́ ко спасе́нию душ свои́х да потща́тся. Па́стырем ея́ да даст Госпо́дь святу́ю ре́вность попече́ния о спасе́нии люде́й, во е́же неве́рующия просвети́ти, неве́дущия наста́вити, сомня́щияся вразуми́ти, отпа́дшия от Правосла́вныя Це́ркве к ней возврати́ти, ве́рующия в ве́ре соблюсти́, гре́шныя на покая́ние подви́гнути, ка́ющияся уте́шити и во исправле́нии жи́зни утверди́ти, и та́ко вся лю́ди ко угото́ванному ве́чному Ца́рству святы́х Его́ привести́. Умоли́ Го́спода, уго́дниче Христо́в: ве́рных рабо́в Его́, в ско́рби и печа́ли день и нощь вопию́щих к Нему́, многоболе́зненный вопль да услы́шит и да изведе́т от поги́бели живо́т наш. Всем же в держа́ве лю́дем да да́рует благи́й Бог наш мир, тишину́, безмяте́жие и изоби́лие плодо́в земны́х, па́че же ко исполне́нию за́поведей Его́ тща́ние неле́ностное; и да изба́вит ца́рствующия гра́ды, град сей и вся ины́я гра́ды и ве́си, от гла́да, тру́са, пото́па, огня́, меча́, наше́ствия иноплеме́нных, междоусо́бныя бра́ни, смертоно́сныя я́звы и от вся́каго зла. Ей, святи́телю Бо́жий, да устро́иши моли́твами твои́ми вся блага́я душа́м и телесе́м на́шим; да и мы просла́вим в душа́х и телесе́х на́ших Го́спода и Бо́га на́шего, Иису́са Христа́, Ему́же со Отце́м и Святы́м Ду́хом сла́ва и держа́ва во ве́ки веко́в. Ами́нь.

Собору Воронежских святых

Тропарь, глас 6
Под покро́вом Пресвяты́я Богоро́дицы,/ низпосланнии на́м духо́внии стра́жи:/ вси́ воро́нежстии святи́и,/ при́снии на́ши со святы́ми Митрофа́ном, Ти́хоном и Анто́нием засту́пницы:/ новому́ченицы и испове́дницы Христо́вы,/ преподо́бнии боголю́бцы и блаже́ннии подви́жницы,/ в по́двизех за Христа́, чудесе́х и страда́ниих/ зе́млю Ру́сскую от ца́рствующих гра́д до Азова осия́вшии,/ Христа́ Бо́га моли́те о стране́ на́шей Правосла́вней// и о все́х собо́рно ва́с почита́ющих.

Кондак, глас 4
Во све́те богому́дрых иера́рхов,/ столпо́в ве́ры Митрофа́на, Ти́хона и Анто́ния,/ дне́сь красу́ется пресла́вный гра́д Воро́неж,/ я́ко освяще́нный собо́р святы́х предстои́т Влады́це Вседержи́телю:/ те́мже Си́лы Небе́сныя ликовству́ют и Святу́ю Тро́ицу воспева́ют;/ с ни́миже вси́ благода́рственно вопие́м Бо́гу/ о е́же дарова́ти на́м оставле́ние грехо́в// и ве́лию ми́лость.

Молитва
Всесла́внии богопропове́дницы и уго́дницы Христо́ви, святи́телие и испове́дницы, преподо́бнии и му́ченицы, и́же в земли́ воро́нежстей просия́вшии, и Це́рковь Христо́ву просла́вльшии, десни́цею Всевы́шняго насажде́нии, и в преди́вных селе́ниих Отца́ Небе́снаго ны́не почива́ющии: пред ико́ною всечестно́ю ва́шею моля́щеся, собо́рную па́мять все́х святы́х кра́я воро́нежскаго и земе́ль ему́ богопричтенных пра́зднующе, со умиле́нием припа́даем пред лико́м ва́шим всесиятельным, и мо́лим вы́: ми́лостию, ю́же стяжа́ли есте́ пред Го́сподем, испроси́те на́м у престо́ла Живонача́льныя Тро́ицы оставле́ния грехо́в и бога́тыя ми́лости. Да просветя́тся вси́ лю́дие, ве́рно почита́ющии всесвяту́ю па́мять ва́шу, све́том доброде́тельнаго и всесмиреннаго жития́, и сия́нием по́двигов и чуде́с ва́ших: да низпо́слет Госпо́дь на́м ми́р и благоде́нствие лю́дем земли́ сея́ и всему́ Оте́честву на́шему Христиа́нскому, да утвержда́ется и процвета́ет в не́м правосла́вие. На заступле́ние Ва́ше упова́юще мы́ святооте́ческаго покро́ва про́сим, я́ко, малове́рных на́с су́щих, ве́рою сквозе́ мра́к ве́ка неве́рия осияваете, и я́ко страстьми́ на́с обурева́емых безстра́стию Христо́ву науча́ете. Те́мже навыко́хом к ва́м прибега́ти, ско́рым целителем и окормителем, и небе́сным стра́жем, засту́пником и защи́тником в мо́ри жите́йстем пребыва́ющым: в ва́с бо, вси́ свя́тии на́ши благоде́телие, богоразу́мию сподобля́емся и в за́поведех Христо́вых соблюда́емся. О вели́ции уго́дницы и святи́телие Бо́жии: сто́лпе ве́ры и богоспасаемаго гра́да Воро́нежа Митрофа́не, чудотво́рче Задо́нский и златословесниче Ти́хоне, тре́тие свети́ло благода́ти земли́ на́шея, святи́телю Анто́ние, духо́вный собрате преди́вному саро́вскому ста́рцу Серафи́му! Возмолитеся со все́ми святы́ми собо́ра уго́дников Христо́вых ко Го́споду на́шему Всеми́лостивому, да да́рует все́м ве́рным ча́дом Его́ ду́х братолю́бия и кро́тости, миролю́бия и смире́ния, во е́же не преткну́тися на́м гре́шным о собла́зны диа́воли, ниже́ преступи́ти слове́с Ева́нгельских, и те́мже да сподо́бит на́с покая́ния всесмиреннаго, ни да отсту́пит от на́с недосто́йных ми́лостию Свое́ю, во е́же и на́м воста́ти во вре́мя подо́бно одесну́ю престо́ла Вседержи́телева, иде́же и вы́, всеблазии засту́пницы на́ши, предстоите́, и вку́пе со а́нгельскими си́лами воспева́ете Животворя́щую Тро́ицу, в Не́йже Отца́, и Сы́на, и Свята́го Ду́ха ны́не, и при́сно, и во ве́ки веко́в: Ами́нь.

Преподобномученику Парфению, игумену Кизилташскому

Тропарь, глас 4
Ве́ры правосла́вныя ревни́телю, мона́шествующих сла́во и похвало́, от ру́к ага́рян злочести́вых му́ченическую сме́рть прия́л еси́, преподобному́чениче Парфе́ние. Моли́ Христа́ Бо́га, страстоте́рпче преди́вный, дарова́ти на́м ми́р и ве́лию ми́лость.

Кондак, глас 3
Избра́ тя́ от ми́ра Христо́с, да просла́виши и́мя Его́ пред челове́ки. За́поведи Госпо́дни исполня́я, Бо́гу и бли́жним до́бре послужи́л еси́. И́стинное послуша́ние о Христе́ яви́л еси́, сего́ ра́ди убие́ние претерпе́л еси́ от люде́й злочести́вых. Преподо́бне о́тче на́ш Парфе́ние, моли́ Христа́ Бо́га спасти́ся душа́м на́шим.

Молитва
О, пресла́вный уго́дниче Бо́жий, преподобному́чениче Парфе́ние, услы́ши моле́ние на́с гре́шных, доброде́тельное житие́, труды́ и страда́ния твоя́ му́ченическия почита́ющих, и те́плым твои́м предста́тельством умоли́ Го́спода Бо́га, да огради́т Це́рковь Свою́ святу́ю от ересе́й и раско́лов, да пода́ст кре́пость и му́дрость ве́рным ча́дом ея́, да низпо́слет ми́р на гра́ды и ве́си на́ша и изба́вит на́с от наше́ствия ага́рянскаго, междоусо́бныя бра́ни и вся́ких раздо́ров и нестрое́ний. Ты́, устрои́тель до́брый Кизилташския кинови́и бы́в, пода́ждь и на́м до́брое устрое́ние, умудря́я на́с ходи́ти пред Бо́гом в благоче́стии и чистоте́, да сподо́бимся христиа́нския кончи́ны живота́ на́шего и жи́зни ве́чныя в Ца́рстве Го́спода на́шего Иису́са Христа́, Ему́же подоба́ет со Отце́м и Святы́м Ду́хом сла́ва, че́сть и поклоне́ние во ве́ки веко́в. Ами́нь.

Священномученику Петру (Зимоничу) Дабро-Боснийскому

Тропарь, глас 8
Ча́ше Христо́вой соприча́стниче и апо́столом сонасле́дниче, священному́чениче Пе́тре, митрополи́те Дабробосанский и архипа́стырю Герцеговацкий, му́ченически еси́ пострадаше в Ясеновац лагере, живо́т ве́чный насле́дуеши с па́ствою твое́ю, что́ ра́ди ве́ры правосла́вной за Христа́ пострада́. И ны́не моли́ Христа́ Бо́га и Спа́са на́шего, святи́телю и новому́чениче, да спасе́т ро́д на́ш правосла́вный.

Пресвятой Богородице пред иконой Ея «Неопалимая Купина»

Тропарь, глас 4
И́же во огни́ купины́ неопали́мыя, дре́вле Моисе́ем ви́денныя,/ та́йну воплоще́ния Своего́ от неискусобра́чныя Де́вы Мари́и Прообразова́вый,/ Той и ны́не, я́ко чуде́с Творе́ц и всея́ тва́ри Созда́тель,/ ико́ну Ея́ святу́ю чудесы́ мно́гими просла́ви,/ дарова́в ю́ ве́рным во исцеле́ние неду́гом/ и в защище́ние от о́гненнаго запале́ния./ Сего́ ра́ди вопие́м Преблагослове́нней:/ наде́ждо христиа́н, от лю́тых бед, огня́ и гро́ма изба́ви на Тя упова́ющия// и спаси́ ду́ши на́ша, я́ко милосе́рда.

Ин тропарь, глас 4
И́же в Купине́, огне́м горя́щей и несгора́емой,/ показа́вый Моисе́ови Пречи́стую Твою́ Ма́терь, Христе́ Бо́же,/ Огнь Божества́ неопа́льне во чре́ве прии́мшую,/ и нетле́нну по Рождестве́ пребы́вшую:/ Тоя́ моли́твами пла́мене страсте́й изба́ви нас,/ и от о́гненных запале́ний град Твой сохрани́,// я́ко Многоми́лостив.

Кондак, глас 8
Предочи́стим чу́вствия душ и теле́с на́ших,/ да ви́дим та́инство Боже́ственное,/ о́бразно явле́нное дре́вле вели́кому во проро́цех Моисе́ю купино́ю,/ горе́вшею огне́м и не сгара́вшею,/ в не́йже Твоего́ безсе́меннаго Рождества́, Богоро́дице, предвозвеще́ние испове́дуем,/ и, благогове́йно покланя́ющеся Тебе́/ и Ро́ждшемуся от Тебе́ Спа́су на́шему, со стра́хом вопие́м:// ра́дуйся, Влады́чице, Покро́ве, и Прибе́жище, и Спасе́ние душ на́ших.

Молитва
О, Пресвята́я и Преблагослове́нная Ма́ти Сладча́йшаго Го́спода на́шего Иису́са Христа́! Припа́даем и поклоня́емся Тебе́ пред свято́ю и пречестно́ю ико́ною Твое́ю, е́юже ди́вны и пресла́вны чудеса́ содева́еши, от о́гненнаго запале́ния и молниено́снаго гро́ма жили́ща на́ша спаса́еши, неду́жныя исцеля́еши и вся́кое благо́е проше́ние на́ше во бла́го исполня́еши. Смире́нно мо́лим Тя, всеси́льная ро́да на́шего Засту́пнице, сподо́би ны немощны́я и гре́шныя Твоего́ Ма́терняго уча́стия и благопопече́ния. Спаси́ и сохрани́, Влады́чице, под кро́вом ми́лости Твоея́ Це́рковь Святу́ю, оби́тель сию́, всю страну́ на́шу правосла́вную, и вся ны припа́дающия к Тебе́ с ве́рою и любо́вию, и умиле́нно прося́щия со слеза́ми Твоего́ заступле́ния. Ей, Госпоже́ Всеми́лостивая, умилосе́рдися на нас, обурева́емых греха́ми мно́гими и не иму́щих дерзнове́ния ко Христу́ Го́споду проси́ти Его о поми́ловании и проще́нии, но Тебе́ предлага́ем к Нему́ на умоле́ние, Ма́терь Его́ по пло́ти: Ты же, Всеблага́я, простри́ к Нему́ Богоприи́мнии ру́це Твои́ и предста́тельствуй за нас пред Бла́гостию Его́, прося́ще нам проще́ния прегреше́ний на́ших, благоче́стнаго ми́рнаго жития́, благи́я христиа́нския кончи́ны, и до́браго отве́та на стра́шнем Суде́ Его́. В час же гро́знаго посеще́ния Бо́жия, егда́ огне́м возгоря́тся до́мы на́ша, или молниено́сным гро́мом устраша́еми бу́дем, яви́ нам ми́лостивное Твое́ заступле́ние и держа́вное вспоможе́ние: да спаса́еми всеси́льными Твои́ми ко Го́споду моли́твами, вре́меннаго наказа́ния Бо́жия зде избе́гнем и ве́чное блаже́нство ра́йское та́мо унасле́дуем: и со все́ми святы́ми воспое́м Пречестно́е и Великоле́пное и́мя поклоня́емыя Тро́ицы, Отца́ и Сы́на и Свята́го Ду́ха, и Твое́ ве́лие к нам милосе́рдие, во ве́ки веко́в. Ами́нь.

В среду, св. Кресту

Тропарь, глас 1
Спаси́, Го́споди, лю́ди Твоя́/ и благослови́ достоя́ние Твое́,/ побе́ды на сопроти́вныя да́руя// и Твое́ сохраня́я Кресто́м Твои́м жи́тельство.

Кондак, глас 4
Вознесы́йся на Крест во́лею,/ тезоимени́тому Твоему́ но́вому жи́тельству,/ щедро́ты Твоя́ да́руй, Христе́ Бо́же,/ возвесели́ нас си́лою Твое́ю,/ побе́ды дая́ нам на сопоста́ты,/ посо́бие иму́щим Твое́ ору́жие ми́ра,// непобеди́мую побе́ду.